Zëvendëskryeministri I Kosovës, z.Behgjet Pacolli ka udhëtuar për në Adis Abeba të Etiopisë për të marrë pjesë në samitin e vendeve të Unionit Afrikan.
Gjatë këtij samiti, zëvendëskryeministri Pacolli do të zhvillojë takime të rëndësishme me udhëheqës shtetesh nga kontinenti I Afrikës, me fokus të veqantë tek shtetet që ende nuk e kanë njohur Republikën e Kosovës.
Në ditën e parë të qëndrimit në Etiopi, zëvendëskryeministri i Kosovës, z.Behgjet Pacolli do të marrë pjesë në ceremoninë e hapjes së konferencës vjetore të Unionit Afrikan që koincidon me 50 vjetorin e themelimit të kësaj organizate. Gjatë kësaj ceremonie zëvendëskryeministri Pacolli pritet të takohet me disa krerë shtetesh me presidentin e Zambisë, Botsvanës, Tanzanisë dhe Sudanit Jugor.
Gjithashtu, në mbrëmje, zëvendëskryeministri Pacolli pritet të zhvillojë një darkë pune me komisioneren e lartë të Unionit Afrikan, Dlamina Zuma dhe me ish presidentin e Nigerisë, z.Olesegun Abasango, që është figurë shumë e respektuar në kontinentin Afrikan.
Aktiviteti diplomatik i zëvendëskryeministrit Pacolli vazhdon edhe të dielën, ku sipas agjendës pritet të zhvillohen takime të rëndësishme në kuadër të samitit të vendeve të Unionit Afrikan, në të cilin është duke marrë pjesë edhe sekretari amerikan i shtetit John Kerry.
Unioni Afrikan është organizatë politike, me 54 shtete anëtare.