Kryeministri i Republikës së Shqipërisë, z.Sali Berisha i ka dërguar një mesazh urimi Presidentit të ri të Kosovës, z. Behgjet Pacolli, me rastin e zgjedhjes së tij në këtë detyrë.
Në telegram thuhet: I nderuar z. President, zgjedhja Juaj në pozicionin e Presidentit të Kosovës më jep kënaqësinë e veçantë, që në emrin tim dhe të qeverisë shqiptare, t’ju përcjell përshëndetjet më të përzemërta dhe urimet më të ngrohta e miqësore për sukses në misionin e lartë e të rëndësishëm përpara. Republika e Kosovës dhe qytetarët e Kosovës kanë korrur arritje të mëdha historike gjatë kësaj periudhe dhe unë ruaj besimin se, si President i shtetit më të ri të Evropës, Ju do të sillni një kontribut të ri në konsolidimin e mëtejshëm të këtyre arritjeve dhe në shndërrimin e Kosovës në një faktor edhe më të rëndësishëm paqeje e stabiliteti dhe promovuese të miqësisë e të bashkëpunimit në rajon. Gjej rastin t’ju siguroj se qeveria shqiptare dhe unë personalisht jemi tërësisht të angazhuar dhe të vendosur për të ndërtuar marrëdhëniet më të shkëlqyera e vëllazërore dhe për të shndërruar bashkëpunimin e ngushtë e të gjithanshëm ndërmjet të dyja vendeve në shembullin më kuptimplotë të bashkëpunimit, në shërbim të forcimit të paqes, promovimit të miqësisë, zhvillimit e mirëqenies jo vetëm të kombit shqiptar, por të të gjithë popujve të rajonit, si dhe për ecjen përpara në rrugën e përbashkët euroatlantike. Duke shpresuar t’ju pres së shpejti në Tiranë, dëshiroj t’ju ripohoj sigurimet e konsideratës sime më të lartë.
Presidentja e Konfederatës së Zvicrës, znj.Micheline Calmy-Rey e ka uruar Presidentin e sapozgjedhur të Republikës së Kosovës, Shkëlqesinë e Tij, z. Behgjet Pacolli.
Në urim thuhet:
Shkëlqesisë së tij, Z.Behgjet Pacolli, President i Republikës së Kosovës
Me rastin e zgjedhjes President i Republikës së Kosovës, kam kënaqësinë që, në emër të Këshillit Federal Zviceran, t’ju shpreh përgëzimet e mia të ngrohta dhe dëshirat më të mira për suksesin e misionit tuaj të lartë dhe për prosperitetin e popullit kosovar. Lidhjet tona të miqësisë dhe bashkëpunimit të tashëm do të intensifikohen edhe më në të ardhmen.
Ju lutem, z. President, pranoni përshëndetjet tona të zgjedhura. Micheline Calmy-Ray
Bashkëngjitur e keni urimin e znj.Micheline Calmy-Rey.
Presidenti i Republikës së Maqedonisë, Gjorgji Ivanov i ka dërguar një mesazh urimi Presidentit të ri të Republikës së Kosovës, Behgjet Pacolli.
“Kam nderin dhe kënaqësinë e veçantë t’ju shpreh urimet e mia më të sinqerta me rastin e zgjedhjes Suaj si President i Republikës së Kosovës. Gjithashtu, më lejoni të përfitoj nga rasti dhe t’ju uroj sukses në kryerjen e funksionit tuaj përgjegjës, shëndet të mirë dhe lumturi personale”, shkruan të telegramin e tij Presidenti Ivanov.“Jam plotësisht i bindur që, në një kohë të shkurtër, me forca të përbashkëta, do të nxisim dhe forcojmë marrëdhëniet mes dy shteteve tona dhe me këtë do të kontribuojmë në thellimin dhe intensifikimin e bashkëpunimit të ndërsjellë mes Republikës së Maqedonisë dhe Republikës së Kosovës, përfshirë fushën e marrëdhënieve bilaterale dhe shumëpalëshe me interes të përbashkët. Për këtë qëllim, ne do të japin kontributin tonë për vizionin që ne të gjithë e ndajmë për rajon të qëndrueshëm dhe të begatë me perspektivë Euro-Atlantike”, thekson, mes të tjerash, në urimin e tij Presidenti i Maqedonisë, Dr. Gjorge Ivanov.
Presidenti i Republikës së Italisë, Giorgio Napolitano i ka dërguar një mesazh urimi Presidentit të ri të Republikës së Kosovës, Behgjet Pacolli.
Në mesazh thuhet:Dëshiroj t’ju shpreh urimet e mia më të përzemërta për zgjedhjen Tuaj si President i Republikës së Kosovës. Italia është shumë e angazhuar në Kosovë, qoftë në planin dypalësh, po ashtu edhe përmes pjesëmarrjes në misionet ndërkombëtare, në mbështetje të sigurisë, të forcimit të rendit dhe të ligjit, si dhe të zhvillimit ekonomik.
Dëshiroj shumë që marrëdhëniet tona dypalëshe të vazhdojnë me intensifikimin dhe thellimin e tyre.Italia, po ashtu, mbështet me bindje të plotë perspektivën evropiane të Kosovës, si dhe rritjen e dukshme të kontributit që mund ta japë vendi Juaj në stabilitetin e gjithë hapësirës ballkanike, po ashtu në bashkëpunimin rajonal. President, Ju lutem, pranoni urimet e mia më të zjarrta për një sukses të plotë në mandatin Tuaj të lartë dhe në prosperitetin e gjithë popullit të Kosovës”, shkruan Giorgio Napolitano.
Presidenti i Republikës së Kosovës, Behgjet Pacolli, ditën e parë të punës e ka nisur me homazhe para varrit dhe vizitën në familjen e Presidentit Historik të Kosovës, dr. Ibrahim Rugova, me homazhe në Kompleksin Memorial në Prekaz dhe vizitën në familjen Jashari, me homazhet në varrezat e dëshmorëve në Gllogjan dhe vizitën në familjen Haradinaj dhe me homazhet para varrit të Heroit të Kosovës, Zahir Pajaziti dhe vizitën në familjen Pajaziti në Orllan.
Gjatë bisedës me familjen Rugova, Presidenti Pacolli foli për kontributin e madh që ka dhënë Presidenti historik, dr. Ibrahim Rugova për popullin dhe shtetin e Kosovës.
Homazhe tek varri i Presidentit Historik dr.Ibrahim Rugova.
“Isha në rezidencën e presidentit historik të Kosovës edhe njëherë të dëshmoj se jam më se i përgatitur ta çojë përpara idenë e tij për forcimin e shtetit të pavarur të Kosovës. Ka shumë punë për t’u bërë dhe jam i gatshëm tani më shumë se asnjëherë për të vepruar”, theksoi Presidenti Pacolli, pas vizitës në familjen Rugova.
Në Rezidencen e familjes së presidentit historik Ibrahim Rugova.
Në vazhdim, Presidenti Pacolli shkoi në Prekaz. Fillimisht ai bëri homazhe para varrit të Komandantit Legjendar Adem Jashari dhe dëshmorëve të tjerë në Kompleksin Memorial në Prekaz, ndërsa më pas vizitoi familjen Jasharaj, ku u prit nga Rifat Jashari.
Homazhe para varrit të Komandantit Legjendar Adem Jashari dhe dëshmorëve të tjerë në Kompleksin Memorial në Prekaz.
Në takimin e përzemërt dhe vëllazëror në odën e Jasharajve, Presidenti Behgjet Pacolli duke përshëndetur të zotin e shtëpisë, bacën Rifat, tha se “sakrifica e heronjve të kësaj shtëpie vuri themelet e shtetit”.
“Familja juaj është një institucion i shtetësisë së Kosovës. Unë betohem se do ta çoj përpara me gjithë fuqinë, me gjithë mundësitë e mia idenë e dëshmorëve për shtetin e Kosovës”, tha Presidenti Behgjet Pacolli.
Shtrënguam duartë me bacën Rifat në takimin e përzemërt dhe vëllazëror në odën e Jasharajve.
Baca Rifat, duke falënderuar për vizitën e Presidentit Pacolli, tha se “tash duhet me u përpjekë të jeni njëshi i shtetit dhe t’i shihni të gjithë në mënyrë të barabartë”. Ai gjithashtu i ofroi Presidentit Pacolli gjithë mbështetjen politike dhe morale të familjes Jashari.
Ndërkaq, Presidenti Pacolli, pas takimit, u shpreh: “Isha në familjen Jashari dhe premtova se do të punoj me çdo gjë që idenë e komandantit legjendar Adem Jashari ta çojmë deri në fund. Ideja e tij ka qenë ndërtimi i shtetit demokratik ku qytetarët e Kosovës do të jetojnë me një mirëqenie të mirë, të qetë dhe të pavarur”.
Në odën e bacës Rifat, në Kullat e Jasharajve, vizita ime e parë si president i Republikës së Kosovës. Fjalët dhe porositë bacës e Rifat, do t’i mbajmë me vete çdo herë, konsultat dhe këshillat nga ai janë gjithnjë të dobishme e jashtëzakonisht të vlefshme.
“Jam shumë krenar që isha këtu. Nuk është hera e parë. Kam ardhur gjithmonë dhe do të vij edhe në të ardhmen për të konfirmuar edhe një herë vullnetin tim shumë të madh për të punuar për Kosovën. Kjo familje është e shenjtë dhe do të mundohem që në mandatin tim të krijohen kushtet që kjo familje të ketë në Prishtinë një përfaqësi institucionale”, tha Presidenti Pacolli.
Nga ana e tij, Rifat Jashari i ka uruar z.Pacolli zgjedhjen në detyrën e Presidentit, duke i thënë se do ta ketë përkrahjen e familjes Jashari dhe duke i dëshiruar shëndet dhe sukses në kryerjen e detyrës së tij.
Nga Prekazi, Presidenti Pacolli vazhdoi rrugën për në Gllogjan, ku fillimisht vendosi kurora lulesh dhe bëri homazhe para varrezave të dëshmorëve në këtë fshat, ndërsa më pas vizitoi edhe familjen Haradinaj, ku u prit nga Hilmi Haradinaj, kryetari i komunës së Deçanit Rasim Selmanaj, si dhe banorë të shumtë të fshatit.
Homazhe dhe vendosje kurora lulesh tek varrezat e dëshmorëve në fshatin Gllogjan.
Presidenti Pacolli vlerësoi mikpritjen e rrallë të kësaj familjeje që kishte pasur rastin ta vizitonte shumë herë. Ai tha se e konsideronte shtëpinë e tyre si pikë referimi për gjithë Kosovën.
Nga ana e tij, Hilmi Haradinaj e uroi Presidentin Pacolli për detyrën e re dhe shprehu besimin se Presidenti Pacolli do të jetë president i të gjithë kosovarëve.
Vizitë në familjen Haradinaj, ku u prita nga Hilmi Haradinaj, kryetari i komunës së Deçanit Rasim Selmanaj, si dhe banorë të shumtë të fshatit.
Duke folur pas vizitës në familjen Haradinaj, Presidenti Pacolli tha se familja Haradinaj ka vlerë shumë të madhe për Kosovën. “Këta dëshmorë që kanë rënë këtu, djemtë e tij (Hilmi Haradinajt), e kanë vulosur pavarësinë e Kosovës. Është obligim i yni që ne këtë pavarësi ta dekorojmë me një ndërtim të një shteti të sinqertë, ku të gjithë qytetarët e Kosovës do ta gjejnë veten, do të jetojnë në qetësi dhe në mirëqenie.
Në vijim, Presidenti Pacolli bëri homazhe para varrit të Heroit të Kosovës, Zahir Pajaziti, në Orllan, ku u prit nga një numër i madh qytetarësh, si dhe zhvilloi një bisedë të përzemërt me familjen Pajaziti.
Homazhe tek varri i Heroit të Kosovës, Zahir Pajaziti.
“Ishim edhe në familjen e dëshmorit tonë Zahir Pajaziti. Vëllanë e dëshmorit e inkurajova dhe i premtova se do të punoj për ta çuar idenë dhe dëshirën e dëshmorit Zahir Pajaziti deri në fund, të krijoj dhe të forcoj një shtet të pavarur të Kosovës, një shtet që garanton të drejtat e barabarta për çdo qytetar dhe një shtet që krijon mirëqenie për çdo qytetar”, theksoi Presidenti Pacolli pas vizitës në familjen Pajaziti.
Ishim edhe në familjen e dëshmorit tonë Zahir Pajaziti. U pritëm nga vëllai i dëshmorit Pajaziti.
Menjëherë pasi u votua nga Kuvendi i Republikës së Kosovës dhe u zgjodh president i vendit, Behgjet Pacolli dha dorëheqjen nga të gjitha detyrat partiake në krye të Aleancës Kosova e Re dhe anëtarësia në këtë parti
Menjëherë pasi u votua nga Kuvendi i Republikës së Kosovës dhe u zgjodh president i vendit, Behgjet Pacolli dha dorëheqjen nga të gjitha detyrat partiake në krye të Aleancës Kosova e Re dhe anëtarësia në këtë parti.
Presidenti i Republikës së Kosovës, Behgjet Pacolli ka marrë urimet e para për zgjedhjen në detyrën e re.
Sapo Parlamenti i Kosovës votoi për President të Republikës zotin Behgjet Pacolli, atij i mbërritën telefonatat e para të urimit nga homologë apo personalitete të shquara ndërkombëtare.I pari që i telefonoi Presidentit Pacolli ishte numri një i shtetit shqiptar, zoti Bamir Topi.
Në telefonatën e përzemërt dhe vëllazërore, zoti Topi i uroi homologut të vet të Kosovës suksese në kryerjen e detyrës së lartë dhe e garantoi në mbështetjen e vazhdueshme dhe të palëkundur të Shqipërisë për Kosovën. Dy Presidentët diskutuan mundësinë e takimeve në të ardhmen.
Në zyrën e tij, Presidenti Behgjet Pacolli mori urimet më të mira për detyrën e tij të re dhe nga shefi i pranisë ndërkombëtare në Kosovë, Piter Faith (Peter Feith). Më pas Presidentin Behgjet Pacolli e uruan me radhë ish Presidenti kroat Stipe Mesiç, ish Presidenti i Shqipërisë, Rexhep Meidani dhe shumë personalitete të tjera publike nga vendi dhe bota.
Behgjet Pacolli u zgjodh sot president i ri i Republikës së Kosovës, pas votimit në Kuvendin e Republikës së Kosovës. Pas zgjedhjes, Behgjet Pacolli dha betimin para deputetëve të Kuvendit të Republikës.
Me këtë rast ai iu drejtua deputetëve dhe qytetarëve të Republikës së Kosovës me një fjalim, të cilën po e sjellim në vijim:
Të nderuar qytetarë të Kosovës, I nderuari Kryetar i Kuvendit të Kosovës, z. Jakup Krasniqi, I nderuari kandidat për Kryeministër, z. Hashim Thaçi, Të nderuar deputetë, E nderuara familje Rugova, E nderuara familje Jashari, Të nderuara familje Haradinaj, Pajaziti dhe të gjitha familjet e tjera të çmuara të dëshmorëve, Të nderuar përfaqësues të korit diplomatik në Kosovë, Të nderuar pjesëmarrës:
Sot është një ditë e madhe, për mua fillon sfida e radhës me plot përgjegjësi. Ju, të dashur deputetë, më zgjodhët mua për të vazhduar rrugën për përkryerjen e vizionit të Presidentit historik, Dr. Ibrahim Rugovës, për të plotësuar amanetin e heronjve tanë, komandantit historik Adem Jasharit dhe gjithë të tjerëve që ranë për shtetin e pavarur të Kosovës.
Falënderoj presidentin e Republikës së Kosovës, dr. Fatmir Sejdiun dhe ushtruesin e këtij posti, z.Jakup Krasniqin, për angazhimin dhe përkushtimin e tyre në këtë detyrë.
Të dashur qytetarë, Sot ndihem i përulur para jush dhe ndjej se nuk më mjaftojnë fjalët që të përshkruaj këtë moment.
Nuk ekziston ndjenjë më e mirë se të fitosh besimin e përfaqësuesve të popullit, që t’i shërbesh popullit dhe vendit tënd.
Unë jam i emocionuar por, nga ana tjetër, shumë i përgatitur që këtë besim që m’u dha sot, ta arsyetoj me dinjitet dhe përgjegjësi, me gjithë energjinë, dijen dhe qenien time.
Jam krenar që jam një nga ju. I lindur dhe i rritur në mjediset e një familjeje tipike të Kosovës, domosdoshmëria më shtyu të ballafaqohem me sfidat e jetës së civilizuar të Perëndimit, jetë kjo jo e lehtë për një kosovar të thjeshtë. Gjatë rrugëtimit tim, shpeshherë jam rrëzuar, por gjithmonë jam ngritur dhe kam vazhduar ende më i fortë.
Ky rrugëtim më solli edhe suksese me të cilat unë krenohem pasi ato i kam arritur me PUNË. Ato suksese janë sukseset e mia dhe bashkëpunëtorëve e farefisit tim. Këto sfida dhe suksese të arritura në Perëndim duhej të plotësoheshin me arritjet e vendit tim.
Unë u ktheva në Kosovë dhe e kuptova se këtu e kam vendin, në mesin e njerëzve të mi. Këtu zemra ime rreh ndryshe. Këtu i gëzohem tokës dhe diellit, më gëzon çdo gjë këtu dhe më fascinon perëndimi. Perëndimi është prej nga erdha unë dhe perëndimi është rruga të cilën e synon Kosova.
I falënderoj miqtë tanë perëndimorë, në veçanti Shtetet e Bashkuara të Amerikës dhe Bashkësinë Evropiane, për ndihmën e madhe që kontribuuan dhe vazhdojnë të kontribuojnë në ndërtimin dhe forcimin e shtetit demokratik të Kosovës për të gjithë qytetarët e saj, për shqiptarët, za serbe, tyrkler için, za bosnjake i crnogorce, për romët, ashkalinjtë, dhe gjithë të tjerët.
Kosova ka fituar Pavarësinë, Lirinë dhe ndërton Barazinë. Tani po ndërtojmë shtetin. Këto arritje i synuam të gjithë dhe punuam me aq sa ditëm dhe mundëm, por ende jemi larg prej të qenurit të kënaqur me arritjet tona. E arritur e veçantë e shtetit të ri të Kosovës është njohja nga 75 shtete të botës, të cilat i falënderoj në emër të popullit të Kosovës.
Kosova sot po ballafaqohet me sfidat më të mëdha që nga çlirimi i saj. Ato janë të shumta dhe do të jenë përgjegjësi e funksionit tim që ma besuat sot.
Përpjekjet e kosovarëve për një të ardhme më të mirë janë virtyt i kosovarëve, jo dobësi. Asnjëherë nuk iu jemi dorëzuar sfidave dhe vështirësive, prandaj, përpjekjet tona për të forcuar institucionet dhe një Kosovë ndryshe, duhet të trajtohen si virtyt dhe domosdoshmëri e kohës në të cilën jetojmë.
Ishim dëshmitarë të përfoljeve, akuzave, etiketimeve të përmasave globale të drejtuara shtetit të Kosovës dhe njerëzve të saj. Por, ju garantoj, të dashur deputetë, se kjo nuk është asgjë e jashtëzakonshme – e njëjta ka ndodhur edhe diku tjetër.
Në procesin e pavarësimit të Kosovës ndodhen veprime të jashtëzakonshme, si të njerëzve të Kosovës, ashtu edhe të ndërkombëtarëve, veprime këto në të cilat u përqendrua edhe opinioni botëror. Pavarësia e Kosovës ishte një histori e suksesit; përvoja ime më ka bindur se suksesi mund edhe të mos falet. Kosova dhe njerëzit e saj shënuan një sukses, shënuan, historinë e shtetit më të ri.
Sot, unë kam marrë një detyrë jo të lehtë. Kam zgjedhur pajtimin dhe angazhimin kundrejt konfliktit dhe pasivitetit. Kam zgjedhur të punoj dhe të angazhohem në këtë rrugë të domosdoshme për Kosovën dhe të ardhmen e saj. Nuk e them se dikush tjetër do ta kishte më të lehtë, sfidat janë për t’u tejkaluar, e detyra ime e re është sfida e radhës. Institucionet demokratike forcohen me angazhimin e pozitës, opozitës dhe shoqërisë civile.
Unë ju garantoj se do të përfaqësoj interesat e të gjithë qytetarëve të Kosovës, pa marrë parasysh bindjet politike. Institucioni të cilin përfaqësoj do të garantojë unitet, stabilitet dhe jam tërësisht i dedikuar t’i shërbej atij funksioni.
Të dashur qytetarë, Unë si President i Republikës së Kosovës, do të jem gjithmonë me ju, pjesë e juaja dhe halleve tuaja, do të punoj dhe angazhohem që të jem pjesë e zgjidhjeve tuaja.
Do të punoj për të sotmen dhe të ardhmen e të gjithë qytetarëve të Kosovës, fëmijëve, të rinjve, prindërve dhe veteranëve të të gjitha kategorive.
Do të angazhohem me mundësitë dhe kompetencat e mia, për mirëqenie më të mirë dhe zhvillim të qëndrueshëm ekonomik. Kosova ka mundësi për më shumë dhe më mirë.
Do të punoj për ruajtjen e integritetit dhe tërësisë territoriale të Republikës së Kosovës, për barazinë në mes të shqiptarëve dhe komuniteteve të tjera etnike si dhe respektimin e të drejtave të të gjithë kosovarëve, pa marrë parasysh përkatësinë etnike, fetare, gjinore apo racore – na kraju svi smo ravnopravni gradjani Republike Kosova.
Do të punoj për një shtet të së drejtës dhe për një shtet ku askush nuk është mbi ligjin. Do të mbështes fuqishëm luftën kundër korrupsionit dhe krimit të organizuar duke siguruar pavarësinë e plotë të sistemit gjyqësor dhe kushtet optimale për punën e tyre.
Do të promovoj idenë për një Kosovë të hapur, e cila garanton lëvizje të lirë të njerëzve, mallrave dhe shërbimeve, për një Kosovë të integruar plotësisht në shtëpinë e madhe evropiane, në NATO dhe në organizatat e tjera botërore.
Do të promovoj idenë për plotësimin e Kushtetutës së Republikës së Kosovës, në mënyrë që në të ardhmen Presidenti i Kosovës të zgjidhet me votën e lirë të qytetarëve.
Do të promovoj idenë e funksionalizimit te referendumit – referendumi është qelizë e rëndësishme e demokracisë.
Do të promovoj idenë e ndryshimit të Ligjit zgjedhor, në mënyrë që të kemi zgjedhje të lira, të drejta, fer dhe korrekte.
Kosova ka qenë dhe mbetet vend, i cili respekton fqinjët dhe kryen obligimet e saj për marrëdhënie sa më të mira fqinjësore me të gjithë fqinjët e saj.
E falënderoj shumë Republikën e Shqipërisë dhe institucionet e saj, për kontributin e jashtëzakonshëm dhënë afirmimit të shtetit të Kosovës.
E çmojmë lart gatishmërinë e Malit të Zi dhe Maqedonisë, për avancimin e raporteve të mira fqinjësore.
Për të gjithë strukturën politike në Kosovë është i rëndësishëm dialogu me Serbinë. Në këtë proces, Kosova do të prezantojë vlerat, idenë dhe vizionin për një fqinjësi të mirë, ku të drejtat e njeriut respektohen dhe vlerësohen në mënyrë reciproke Parimet e fqinjësisë së mirë janë bazë për integrime rajonale dhe globale.
Do të punoj me gjithë qenien time që ta ngre Kosovën në mesin e shteteve të respektuara dhe të vlerësuara të botës. Në mesin e shteteve të respektuara me të ardhme të ndritur, atje ku qytetari është në qendër të vendimmarrjes dhe është esenca e qeverisjes.
Kosova e meriton këtë, kosovarët e meritojnë të jetojnë në vend me një të ardhme të ndritur dhe këtë mund ta arrijmë vetëm me punë të madhe dhe përkushtim të sinqertë.
Rol të veçantë në këtë proces ka rinia jonë. Për rininë ne duhet të krijojmë kushte më të mira jetësore dhe perspektivë të sigurt.
Me këtë mandat po hyjmë në fazën e re të shtet-ndërtimit të Kosovës, në fazën kur duhet të forcojmë fundamentet e shtetit të Kosovës, me vizion të qartë dhe pa frikë nga e ardhmja. Ne do të korrim sukses, sepse jemi të përkushtuar që suksesin ta arrijmë vetëm me punë profesionale dhe të ndershme.
Prandaj, të dashur qytetarë të Kosovës dhe deputetë të Kuvendit të Republikës së Kosovës, SË BASHKU T’IA FILLOJMË PUNËS – JEMI VONUAR.
Faleminderit edhe një herë dhe Zoti na ndihmoftë në rrugëtimin tonë të përbashkët! Zoti e bekoftë popullin e Kosovës, Zoti i bekoftë të gjithë popujt e botës!
Nënat që kanë të afërmit e tyre të zhdukur nga lufta e fundit në Kosovë kanë hyrë në grevë. Greven po e zhvillojnë në një stend që e kanë ngrehur në shesh. Si Presidenti i AKR-së isha personi i parë që vizitova pasditen e 7 tetorit. Askush nga institucionet nuk i kishte vizituar për t’i dëgjuar hallete tyre.
Edhe pse shëndeti i tyre po përkeqësohej, ato nuk po ndaleshin, më thane se janë të vendosura të mos i japin fund grevës derisa të gjenden eshtrat e fundit në morg. I’u premtova që personalisht do të kujdesem që kjo çështje të zgjidhej sa më shpejt, vetëm se të ndërpresin grevën.
“Për shëndetin tuaj, ju kërkoj të përfundoni këtë grevë dhe të shkoni në shtëpi. Ju premtoj se do të bëj çmos për të gjetur një zgjidhje”
E pranova se nuk është bërë shumë për këtë çështje, por premtova se do të bëjë gjithçka, por jo në këtë mënyrë, jo me grevë. Nënat greviste më falënderuan për mbështetjen që po i ofroja. Por thanë këtë herë nuk do të shkojnë në shtëpi pa kockën e të zhdukurit të fundit.
Unë shqetësohesha se gjendja shëndetësore e tyre nuk ishte e mirë. Duke u larguar me zemër të lënduar dhe dhimbje të madhe për to, u premtova se shumë shpejt do t’i vizitojë sërish për të gjetur një zgjidhje.
Në momentin kur vendosa të udhëtoja për Palestinë, ndjeva një përzemërsi të ndryshme nga çdo eksperiencë e mëparshme. Ky udhëtim ishte në vazhdën turit lobues nëpër vendet arabe për të marrë njohjen e Kosovës.
Populli palestinez është një komb i fortë dhe i vendosur, i cili ka përjetuar sfida të shumta në rrugën drejt pavarësisë së tyre. Ata janë një komunitet i mbijetuar, i cili ka ruajtur traditat dhe identitetin e tyre nën kushtet më të vështira.
Atje do të takoja bashkëshorten e ish-presidentit, Jaser Arafat. Isha kurreshtar për të njohur zonjën e parë Suha Yaser Arafat dhe për të ndarë momente me popullin palestinez shtoi emocionet e mia. Kjo eksperiencë e re shihej si një mundësi e jashtëzakonshme për të krijuar lidhje dhe për të përjetuar një pjesë të rrallë të historisë së këtij populli të fortë dhe vendit të tyre.
Vizita ishte një ngjarje e rëndësishme diplomatike për Republikën e Kosovës. U bëra pjesë e një atmosfere të ngrohtë dhe mikpritëse nga ana e Suha Yaser Arafat dhe popullit palestinez. Zonja e parë, Suha Yaser Arafat, njihet për angazhimin dhe përkushtimin e saj ndaj kauzës palestineze.
Unë isha në dijeni se po takoja një figurë të rëndësishme në historinë e Palestinës e cila ka luajtur rol të rëndësishëm në mbrojtjen e të drejtave të popullit të saj. Me njohjen e saj të thellë të situatës dhe angazhimin për paqen dhe drejtësinë, ajo ka lënë një ndikim të madh në skenën ndërkombëtare.
Me vizitën e time në këtë kontekst, pata rastin që gjatë takimit me znj. Arafat, t’i kërkoi asaj mbështetjen e saj në lobimin për njohjen e Kosovës. Gjatë një bisede zonja Arafat premtoi se do të punojë me mua sepse ka kontakte të mira me shumë presidentë të rëndësishëm.
Burri i saj, Presidenti Yaser Arafat, ishte një lider i shquar dhe simbol i pavarësisë së Palestinës. Ai ka qenë një protagonist kryesor në luftën e popullit palestinez për liri dhe pavarësi.
