Aleanca Kosova e Re

Tag: Njohja

  • Presidenti Pacolli – Arkitekti i Njohjes së 118-të të Kosovës nga Kenia

    Presidenti Pacolli – Arkitekti i Njohjes së 118-të të Kosovës nga Kenia

    Nairobi, 26 mars 2025–

    Behgjet Pacolli – Ish President i Republikës së Kosovës.

    Kosova shkruan histori!

    Më 26 mars 2025, Republika e Kenias – një nga shtetet më me ndikim në Afrikë – e njohu zyrtarisht Republikën e Kosovës si një shtet të pavarur dhe sovran.

    Kjo njohje përbën një moment historik për diplomacinë e Kosovës dhe konfirmon vendin e saj të merituar në arenën ndërkombëtare. Me këtë akt, Kosova forcon praninë e saj në kontinentin afrikan dhe thellon marrëdhëniet e saj me një nga ekonomitë dhe fuqitë më të rëndësishme të Afrikës.

    Një rrugëtim 16-vjeçar drejt njohjes

    Kjo arritje nuk është e rastësishme, por rezultat i një angazhimi të gjatë diplomatik. Që nga viti 2009, kam punuar në mënyrë të vazhdueshme me liderë dhe institucione të Kenias për të ndërtuar një partneritet të besueshëm dhe për ta sjellë këtë moment historik.

    Presidenti William Ruto, i cili e vizitoi Kosovën në vitin 2019, kishte shprehur mbështetjen e tij për njohjen e Kosovës. Në vitin 2023, gjatë një takimi në Nairobi, ai ndërmori hapin e parë duke njohur pasaportat e Kosovës. Sot, ai konkretizoi këtë përkushtim me nënshkrimin e njohjes zyrtare të Kosovës.

    Një thirrje për hapa të mëtejshëm

    Në dritën e kësaj njohjeje, i bëj thirrje Qeverisë së Kosovës që të ndërmarrë hapa konkretë për vendosjen e marrëdhënieve diplomatike me Kenian. Hapurja e një Ambasade të Kosovës në Nairobi do të ishte një hap strategjik për zgjerimin e pranisë së Kosovës në kontinentin afrikan dhe forcimin e lidhjeve ekonomike, diplomatike dhe kulturore me shtetet afrikane.

    Mirënjohje për bashkëpunëtorët

    Ky sukses nuk do të ishte i mundur pa mbështetjen e bashkëpunëtorëve dhe partnerëve ndërkombëtarë. Dua të shpreh falënderime të veçanta për Jetlir Zyberaj, i cili ka luajtur një rol kyç në këtë proces, si dhe për Republikën e Shqipërisë, Presidentin Bajram Begaj dhe Kryeministrin Edi Rama, për mbështetjen e tyre të vazhdueshme.

    Sot është një ditë e madhe për diplomacinë dhe shtetësinë e Kosovës. Njohja e Kenias është një hap i rëndësishëm për përforcimin e sovranitetit tonë në arenën ndërkombëtare dhe një dëshmi se me punë, përkushtim dhe diplomaci aktive, Kosova vazhdon të ecë përpara.

    Faleminderit Kenia! Faleminderit President Ruto! Rroftë Kosova dhe qytetarët e saj krenarë!

    Historia e Lobimit për njohjen e Kosovës nga Kenia

     – Fillimi i përpjekjeve

    Që nga shpallja e pavarësisë më 17 shkurt 2008, Kosova nisi një fushatë të gjerë diplomatike për të siguruar njohjen nga sa më shumë shtete. Kenia ishte një nga prioritetet për shkak të rolit të saj të rëndësishëm në Afrikën Lindore dhe organizatat ndërkombëtare.

    Vizita ime e parë në shtetin e Kenias në vitin 2009. Takim dhe shtrëngim duarsh me presidentin aktual dhe mikun tim William Ruto, i cili në atë periudh ishte në opozitë.

    Gjatë viteve, ky angazhim u forcua përmes kontakteve dhe lobimeve diplomatike që kulmuan në takime të rëndësishme. Njëri nga këto takime ishte edhe ai në New York gjatë shtatorit të vitit 2017.

    Ku ish-presidenti, Behgjet Pacolli, i cili ishte në cilësinë e kryediplomatit kosovar pjesmarrës në kuadër të punimeve të Asamblesë së Përgjithshme të OKB-së, zhvilloi takim me homologen nga Kenia, Amina Mohamed. Ky takim ishte një moment i rëndësishëm për të thelluar dialogun mes dy vendeve dhe për të shpresuar në një njohje të shpejtë.

    Nju Jork, 21 shtator 2017 – Bashkëbisedim me Ministren e Jashtme të Kenyas, Amina Mohammed.

    Ky takim shënoi një hap të rëndësishëm në thellimin e dialogut mes Kosovës dhe Kenias, duke krijuar një platformë të qëndrueshme për bashkëpunim diplomatik dhe hapjen e mundësive për të diskutuar njohjen.

    Ky dialog nisi një fazë të re përpjekjesh për afrimin e marrëdhënieve mes dy vendeve. Me përkushtim dhe një qasje të vazhdueshme, diplomacia kosovare forcoi kontaktet në vitet pasuese, duke u orientuar drejt ndërtimit të një partneriteti të qëndrueshëm.

    Pikërisht në këtë frymë, më 12 dhjetor 2018, unë aterova në aeroportin e Nairobit, i gatshëm për të avancuar lidhjet tona. Falë vizitave të shpeshta në shtetet afrikane, kisha mësuar disa shprehje miqësore; sapo zbrita, thash “Vipi WaKenya! (Përshëndetje Kenias!)”. Një përshëndetje që u mirëprit ngrohtësisht dhe shërbeu për të shprehur respektin dhe dëshirën për një miqësi të gjatë mes vendeve tona.

    Pritja ishte zyrtare nga presidenti i asaj kohe, Uhuru Kenyatta.

    Presidentit Kenyatta  i’a përsërita me bindje: “Gëzohem që jam në Kenia, një komb me të cilin kemi një miqësi të thellë dhe që shpresoj të jetë e gjatë”.

    Nairobi, 12 dhjetor 2018 – Gjatë takimit me presidentin e Kenias, Uhuru Kenyatta.

    2010 – 2024: Vitet e negociatave dhe vizitat kyçe

    Në 19 prill 2019, Prishtina u bë dëshmitare e një ngjarjeje historike, kur zëvendëspresidenti i Kenias, William Ruto, zbarkoi në Aeroportin Ndërkombëtar të Prishtinës. Garda ceremoniale e Forcës së Sigurisë së Kosovës (FSK) ishte rreshtuar në mënyrë solemne, duke nderuar një lider ndërkombëtar të rangut të lartë.

    Zëvendëskryeministri Behgjet Pacolli e priti ngrohtësisht z.Ruto, duke shtrënguar duart me të si shenjë miqësie dhe vlerësimi të thellë.

    Prishtinë, 19 prill 2019 – Garda ceremoniale e FSK-së është rreshtuar si zakonisht në pritje të një zyrtari të lartë, kësaj radhe për zv. Presidentin e Kenyas, Willlliam Ruto.
    Prishtinë, 19 prill 2019 – Garda ceremoniale e FSK-së është rreshtuar si zakonisht në pritje të një zyrtari të lartë, kësaj radhe për zv. Presidentin e Kenyas, Willlliam Ruto. Ky i fundit duke nderuar garden e ushtrisë dhe flamurin e Republikës së Kosovës.

    Nga aeroporti, z.Ruto vazhdoi axhendën e tij në Prishtinë, ku zhvilloi takime të rëndësishme me Presidentin Hashim Thaçi dhe Kryeministrin Ramush Haradinaj. Këto takime u fokusuan në çështjet e njohjes së pavarësisë së Kosovës dhe në vendosjen e marrëdhënieve diplomatike.

    Ajo ditë solli jo vetëm një hap të rëndësishëm për të ardhmen e marrëdhënieve mes Kosovës dhe Kenias, por edhe një shembull frymëzues për angazhimin ndërkombëtar në ndërtimin e lidhjeve miqësore.

    Prishtinë, 19 prill 2019 –Takimi i Presidentit të Republikës së Kosovës, Hashim Thaçi me Zv.Presidentin e Kenyas, William Ruto.
    Prishtinë, 19 prill 2019 –Takimi i Kryeministrit të Republikës së Kosovës, Ramush Haradinaj me Zv.Presidentin e Kenyas, Willlliam Ruto.

    Kur mendoj për marrëdhëniet mes Kosovës dhe Kenias, më kujtohet me krenari momenti kur zëvendëspresidenti William Ruto u zgjodh President i Kenias më 9 gusht 2022. Ky ishte një hap i madh për Kenian dhe një mundësi e re për Kosovën.

    Në mars 2023, pata nderin të udhëtoj në Nairobi për të forcuar këto lidhje. Gjatë vizitës sime, Presidenti Ruto njoftoi njohjen e pasaportës së Republikës së Kosovës – një hap konkret dhe historik që shënoi fillimin e bashkëpunimit zyrtar mes dy vendeve tona.

    Nairobi, 19 prill 2019 –Vizita ime vite më parë në Nairobi të Kenias, kur takoja mikun tim William Ruto, tani president i Kenias.

    Më 10 korrik 2023, gjatë një takimi në pallatin presidencial në Nairobi, Presidenti Ruto shpalli një tjetër vendim të rëndësishëm: qytetarët kosovarë mund të udhëtojnë në Kenia pa viza. Ky ishte një moment që simbolizonte jo vetëm afrimin e dy vendeve, por edhe miqësinë e sinqertë që kemi ndërtuar ndër vite. Me humor, Presidenti Ruto tha se ndjehej “gjysmë kosovar,” një shprehje që reflektonte afërsinë dhe respektin e ndërsjellë.

    Këto momente janë dëshmi e fuqisë së diplomacisë dhe e përkushtimit tonë për të ndërtuar ura bashkëpunimi. Jam krenar për këtë rrugëtim dhe për mundësitë që po krijojmë për të dyja vendet tona.

    Nairobi, 17 mars 2023 – Momente nga pallati Presidencial i shtetit të Kenias, së bashku me Presidentin Ruto.

    Pas dy takimeve të suksesshme në Nairobi, ku Kenia njohu pasaportën e Kosovës dhe hoqi vizat për qytetarët kosovarë, ne hymë në një epokë të re të marrëdhënieve tona.

    Ishte një moment historik që dëshmoi vullnetin dhe përkushtimin e Kenias për t’i thelluar lidhjet tona. Në vazhdën e këtyre zhvillimeve, takimi në New York, gjatë Asamblesë së Përgjithshme të OKB-së në shtator të vitit 2024, erdhi si një hap i natyrshëm për të forcuar edhe më tej këtë miqësi të kahmotshme.

    New York, shtator 2024 – Me presidentin e Kenias, William Ruto, shtrënguam duarte çka simbolizon një bashkëpunim të ri dhe një angazhim për zhvillim të përbashkët dhe mbështetje reciproke në skenën ndërkombëtare.

    Gjatë këtij takimi, unë dhe Presidenti Ruto patëm mundësinë të vazhdojmë dialogun tonë të bazuar mbi respektin dhe vlerat e përbashkëta. Diskutuam mbi hapa konkretë për të avancuar qëllimin tonë kryesor: njohjen e Kosovës si shtet sovran. Ishte një moment i rëndësishëm që përforcoi rrugën tonë drejt një të ardhmeje më të ndritshme.

    Pas një rrugëtimi të gjatë diplomatik dhe përpjekjeve të palodhura, më 26 mars 2025, në një ceremoni zyrtare, Presidenti i Kenias, William Ruto, nënshkroi Notën Verbale që konfirmonte njohjen e Kosovës si shtet sovran. Ishte një moment historik për vendin tonë dhe për marrëdhëniet tona me Kenian.

    Nairobi, 26 mars 2025 – Ish – Presidenti Behgjet Pacolli, duke pranuar noten verbale të njohjes së Republikës së Kosovës nga shteti i Kenias.

    Gjatë nënshkrimit, Presidenti Ruto deklaroi: “Njohja e Kosovës si shtet i pavarur është një hap drejt forcimit të paqes dhe stabilitetit ndërkombëtar. Ky vendim reflekton vlerat tona të përbashkëta dhe përkushtimin tonë për të mbështetur të drejtën e popujve për liri dhe sovranitet.”

    Këto fjalë ishin një dëshmi e mbështetjes së tij të sinqertë për Kosovën dhe për të ardhmen tonë si një shtet i njohur  ndërkombëtarisht.

    Nairobi, 26 mars 2025– Presidenti kenian, William Ruto, duke nënshkruar Noten Verbale, e cila konfirmon përfundimisht njohjen e Republikës së Kosovës.

    Nga ana ime, si përfaqësues i Kosovës, pata nderin të pranoj këtë dokument historik. Në atë moment, ndjeva një krenari të jashtëzakonshme për popullin tonë dhe për rrugën që kemi përshkuar. Unë theksova: “Kjo njohje është një fitore e madhe për Kosovën dhe një dëshmi e punës sonë të palodhshme për të ndërtuar marrëdhënie të forta dhe të qëndrueshme me komunitetin ndërkombëtar. Falënderoj Presidentin Ruto dhe popullin e Kenias për këtë akt të madh miqësie dhe mbështetjeje.”

    Ky moment shënon një kapitull të ri për Kosovën dhe për marrëdhëniet tona me Kenian, duke hapur dyer të reja për bashkëpunim dhe zhvillim të përbashkët.

    Nota Verbale e njhojes se Kosoves nga shteti i Kenias.
    Nairobi, 26 mars 2025 – Ish – Presidenti Behgjet Pacolli, me bashkëpuntorin e ngushtë Jetlir Zyberaj, dhe Presidentin Ruto, duke realizuar një fotografi që mbetet histori.

    Si raportuan mediat?

    Ngjarja historike që u zhvillua në Nairobi në Kosovë u prit me një entuziazëm të jashtëzakonshëm, duke ngjallur emocion dhe krenari kombëtare. Pas katër vitesh pritjeje, erdhi njohja shumë e pritur për pavarësinë e Kosovës, me Izraelin që u bë shteti i fundit që njohu pavarësinë në shkurt të vitit 2021.

    Ky zhvillim historik tronditi faqet kryesore të çdo gazete online, u pasqyrua në çdo program radiofonik dhe televiziv, duke u bërë temë qendrore e diskutimeve ndërkombëtare.

    Titujt e gazetave kosovare menjëherë pasi kuptuan se Kenia ka njohur Republiken e Kosovës.
    Ky ishte një nga raportimet e portalit Koha.net.
    Raportimi nga mediat më prestigjioze ndërkombëtare, siç është Reuters.
    Një nga raportimet e mediave nga kontinenti Afrikan.

    Reagimet nga spektri politik shqiptar  

    Njohja e Kosovës nga Kenia është një moment historik që ka ngjallur reagime të shumta dhe mirënjohje nga spektri politik shqiptar. Presidenti William Ruto i Kenias u vlerësua gjerësisht për vendimin e tij të guximshëm për të njohur pavarësinë e Kosovës, duke hapur rrugën për marrëdhënie diplomatike dhe bashkëpunim të thelluar mes dy vendeve.

    Një falënderim i veçantë iu adresua ish-presidentit të Kosovës, Behgjet Pacollit, për përkushtimin dhe lobimin e tij të palodhshëm, që luajti një rol kyç në arritjen e kësaj njohjeje. Ky akt diplomatik është pritur me entuziazëm dhe krenari nga liderët shqiptarë, të cilët e shohin si një hap të rëndësishëm drejt forcimit të pozitës ndërkombëtare të Kosovës.

    Falënderimi i Presidentes së Kosovës, Vjosa Osmani, në momentin që ka pranuar Notën Verbale nga shteti i Kenias.
    Një falënderim për presidentin Ruto dhe Presidentin Pacolli nga kryeministri i Kosovës, Albin Kurti.
    Presidenti shqiptar Bajram Begaj, ka shkruar në platformen X një falenderim të veçant për Presidentin William Ruto.

    Njohja e Kosovës nga Kenia është një dëshmi e fuqisë së diplomacisë së qëndrueshme dhe e angazhimit afatgjatë në marrëdhëniet ndërkombëtare. Kjo arritje duhet të shërbejë si një shembull për përpjekjet e ardhshme në sigurimin e njohjeve të tjera për Kosovën dhe forcimin e pozitës së saj globale.

  • Comoros më dërgojnë letër, njohja e lidhur njëherë mes nesh, vazhdon e paprekur

    Comoros më dërgojnë letër, njohja e lidhur njëherë mes nesh, vazhdon e paprekur

    Prishtinë, 7 shkurt 2021 –

    Kam pranuar një letër nga ministri i punëve të jashtme të Comors, i cili më siguron se njohja e lidhur njëherë mes nesh, vazhdon e paprekur dhe e shëndoshë si atëherë kur e arritëm.

    Pas lobimit intensiv dhe udhëtimeve të shumta, kishim arritur që të sigurojmë njohjen e Comors. Propaganda parapolitike serbe ka tentuar shumë që të ndikojë në këtë shtet që ta tërheqë njohjen dhe ta zhbëjë punë tonë.

    Madje ka pasur edhe lajme në mediat serbe se Comors ka tërhequr njohjen. Por, miqësitë e vendosura nga ne, janë të pazhbëshme, sepse janë produkt i punës, angazhimit e dashurisë për vendin.

    Prandaj ministri i Comors më shkruan se lajmet janë të pavërteta dhe njohja e ndërsjellë vazhdon e paprekur.

    Përkundër se aktualisht nuk jam në pozitë zyrtare si Ministër i Punëve të Jashtme dhe as nuk mbaj post tjetër qeveritar, letra më është dërguar mua.

    Miqësia e krijuar nga takimet e shumta e bisedat e gjata argumentuese për ta njohur Kosovën u kanë mbetur në mendje liderëve nëpër botë, ndaj edhe kur unë personalisht nuk jam në pushtet, ata më drejtohen mua me letrat zyrtare.

    Më vjen mirë që kam krijuar e mirëmbajtur këto kontakte dhe jam adresë për miqtë tanë. Por, në këtë mes ka një dhimbje.

    Politika jonë e jashtme, meqë nuk ka arritur të krijojë njohje të reja, të paktën do të duhej të krijonte një sistem të mirëmbajtjes së raporteve dhe letra si kjo t’i shkojnë shtetit, pastaj mua.

    Është jetike që të rifunksionalizohet politika e jashtme e Kosovës dhe të krijohet një sistem që i qëndron ndërrimit të pushtëve e që nuk afektohet nga përçarjet banale të politikës së brendshme.

    Për ata që nuk e njohin shtetin e Comors. Ai është një shtet i bukur, i përbërë nga një grup ishujsh, në bregun lindor të Afrikës.

  • Njohja e Kosovës nga Barbadosi

    Njohja e Kosovës nga Barbadosi

    Prishtinë, 15 shkurt 2018

    Si rezultat i rritjes së dinamikës dhe shtimit të angazhimit në politikën e jashtme, shteti i Barbadosit njeh Republikën e Kosovës, duke bërë një dhuratë të mirë në shënimin e vitit jubilar të Pavarësisë së Kosovës dhe duke i dhënë një goditje të fortë propagandës serbe me lajmeve të rreme.

    Prishtinë, 15 shkurt 2018 – Nota verbale e njohjes së Pavarsisë së Kosovës.

    Kurse pak ditë pasi që Barbadosi e njohu Kosovën si shtet të pavarur dhe sovran, u nënshkrua edhe vendosja e Marrëdhënieve Diplomatike në mes dy vende në New York.

    Kjo është dëshmia më e mirë se sukseset e Kosovës në diplomaci janë të pandalshme dhe të pakthyeshme.

    Ney York, 12 mars 2018 – Shefja e Misionit të Konsullatës së Përgjithshme të Kosovës në Nju Jork, Teuta Sahatqija, ka nënshkruar marrëveshjen e përbashkët në emër të Republikës së Kosovës.

    E ngarkuara me punë në Misionin e Përhershëm të Barbados në Kombet e Bashkuara, Juliette Babb-Riley, nënshkroi marrëveshjen e përbashkët që zyrtarizonin vendosjen e marrëdhënieve dypalëshe me të dy vendet, në Nju Jork javën e kaluar.

    Shefja e Misionit të Konsullatës së Përgjithshme të Kosovës në Nju Jork, Teuta Sahatqija, ka nënshkruar marrëveshjen e përbashkët në emër të Republikës së Kosovës.

    Të dyja qeveritë riafirmuan angazhimin e tyre ndaj parimeve të së drejtës ndërkombëtare, duke përfshirë respektimin e ndërsjellë për sovranitetin kombëtar; integriteti territorial dhe mosndërhyrja në punët e brendshme të një shteti tjetër.

    Ney York, 12 mars 2018 – Të dyja qeveritë riafirmuan angazhimin e tyre ndaj parimeve të së drejtës ndërkombëtare, duke përfshirë respektimin e ndërsjellë për sovranitetin kombëtar; integriteti territorial dhe mosndërhyrja në punët e brendshme të një shteti tjetër.
  • Republika e Burundit njeh Republikën e Kosovës

    Republika e Burundit njeh Republikën e Kosovës

    Republika e Burundit është shteti i radhës i OKB-së që e njeh Republikën e Kosovës, si shtet të pavarur dhe sovran.

    Nota verbale e njohjes i është dorëzuar zëvendëskryeministrit të Kosovës, z.Behgjet Pacolli nga ministri i punëve të Jashtme të Burundit z. Laurent Kavakure, në kryeqytetin këtij shteti, Bujumbura.

    Nota Verbale që konfirmon njohjen e pavarsisë së Kosovës nga Republika e Burundit.

    Republika e Burundit është shteti i parë i vendeve anëtare të SADC dhe Afrikës lindore që njeh pavarësinë e Republikës së Kosovës. 

    Njohja nga ky shtet është e rëndësishme edhe për faktin se thehet akulli tek këto vende të cilat kultivojnë marëdhënie të mira me vendet si Rusia, Kina dhe India që kundërshtojnë pavarësinë e Kosovës. 

    Gjithashtu, në këtë pjesë të Afrikës, edhe lobimi serb është shumë i angazhuar veqanërisht në sferën ekonomike. Në kontekst të kësaj edhe angazhimi i fundit i zëvendëskryeministrit Pacolli në këtë pjesë ka qenë shumë intensiv. 

    Gjatë turneut dy javorësh, z.Pacolli ka vizituar disa herë Zambinë, Burundin, Rwandën, Tanzaninë, Kenyan dhe Sudanin e Jugut.

  • Njohja nga Gaboni meritë e Pacollit

    Njohja nga Gaboni meritë e Pacollit

    Njohja nga Republika e Gabonit, eshte konfirmuar zyrtarisht nga zëvendëskryeministri i parë i Qeverisë së Republikës së Kosovës, z.Behgjet Pacolli me datë 9 shtator të këtij viti.

    Nota verbale e njohjes e nënshkruar nga ministri i punëve të Jashtme të Gabonit, Paul Toungui, është lëshuar me datë 15 shtator 2011.

    Me datë 9 shtator 2011, Zëvendëskryeministri i parë i Qeverisë së Republikës së Kosovës, Behgjet Pacolli kishte konfirmuar zyrtarisht, ardhjen e njohjes së 82 për shtetin e Kosovës, nga Republika e Gabonit.

    Njohja zyrtarisht I ishte konfirmuar zëvendëskryeministrit Pacolli, në orët e vonë të mbrëmjes në Gabon, nga udhëheqësit më të lartë të këtij shteti.

    Nota Verbale nga Gaboni e cila konfirmon njohjen e Republikës së Kosovës.
  • Afrika qendrore njeh pavarësinë e Kosovës

    Afrika qendrore njeh pavarësinë e Kosovës

    Kosova ka fituar njohjen e 77-të ndërkombëtare. Republika e Afrikës Qendrore është shteti i radhës që e ka pranuar Kosovën shtet të pavarur dhe sovran.

    Lajmin e ka konfirmuar në një konferencë për media zëvendëskryeministri Behxhet Pacolli.

    Kryeqyteti i Afrikës qendrore është Bangui.

    Njohja e sotme vjen një vit pasi Gjykata Ndërkombëtare e Drejtësisë e ka vlerësuar shpalljen e pavarësisë së Kosovës në harmoni me të drejtën ndërkombëtare.

    Nota Verbale nga Afrika Qendrore për njohjen e Pavarsisë së Kosovës.
  • Njohja zyrtarisht i është konfirmuar zëvendëskryeministrit Pacolli, në orët e vonë të mbrëmjes së kaluar, në Gabon

    Njohja zyrtarisht i është konfirmuar zëvendëskryeministrit Pacolli, në orët e vonë të mbrëmjes së kaluar, në Gabon

    Zëvendëskryeministri i parë i Qeverisë së Republikës së Kosovës, Behgjet Pacolli konfirmon zyrtarisht, ardhjen e njohjes së re për shtetin e Kosovës, nga Republika e Gabonit.

    Njohja zyrtarisht i është konfirmuar zëvendëskryeministrit Pacolli, në orët e vonë të mbrëmjes së kaluar, në Gabon, nga udhëheqësit më të lartë të këtij shteti, thuhet në njoftimin për media të Zyrës së zëvendëskryeministrit Pacolli.

    Gaboni është një ndër shtetet e Afrikës së Mesme.

    Nota verbale e Gabonit që njeh Republikën e Kosovës.
  • Behgjet Pacolli sjell njohjen nga Benini

    Behgjet Pacolli sjell njohjen nga Benini

    Republika e Beninit është shteti i 80-të që ka njohur shtetin e Kosovës. Zëvendëskryeministri i parë i Qeverisë së Republikës së Kosovës, Behgjet Pacolli, ka konfirmuar zyrtarisht njohjen e shtetit të Kosovës nga Republika e Beninit.

    Njohja nga Benini i është dorëzuar zëvendëskryeministrit Behgjet Pacolli nga presidenti i Beninit, Yayi Boni gjatë një takimit zyrtar. Kjo njohje është rezultat i aktiviteteve të vazhdueshme lobuese të Behgjet Pacollit.

    Ibrahim Gashi, zëvendësministër i Punëve të Jashtme në një konferencë për media tha se njohja nga Benini është rezultat i angazhimit të Pacollit në kontinentin e Afrikës.

    Sipas tij, shumë shpejt pritet që Kosovën ta njoh edhe Nigeria, me presidentin e së cilës Pacolli ka pasur një darkë pune dhe ka marrë premtim për njohje.

    Ai ka mohuar se angazhimi i zëvendëskryeministrit Pacolli për njohje po len nën hije Ministrinë e Punëve të Jashtme. Sipas tij strategjia është bërë edhe në koordinim me MPJ-në, Qeverinë dhe Presidenten e Kosovës.

    Zëvendësministri i Punëve të Jashtme, Ibrahim Gashi tha se janë në rrugë të mirë edhe në kontinentin e Afrikës dhe Azisë për njohje të reja.

    Republika e Beninit kufizohet me Togon, Nigerinë, Burkina Fason dhe Nigerin.

    Kryeqyteti i Beninit është Porto Novo. Benini ka një sipërfaqe prej 110 mijë kilometrash, me rreth 9 milionë banorë.

  • Gjatë aktiviteteve lobuese në Afrikë, u prita në takim nga Ministri i punëve të Jashtme të Ghanës, Mohamet Mumini

    Gjatë aktiviteteve lobuese në Afrikë, u prita në takim nga Ministri i punëve të Jashtme të Ghanës, Mohamet Mumini

    Accra, 22 qershor 2011

    Z. Behgjet Pacolli u prit nga autoritetet më të larta shtetërore të Ghanës, në Accra, si ish President dhe në cilësinë e zv.Kryeministrit të parë të Republikës së Kosovës.

    Në kuadër të angazhimeve lobuese, që po zhvillon për herë të dytë brenda një kohe të shkurtër në Afrikë, zv.Kryeministri, z. Pacolli, ka takuar Ministrin e Punëve të jashtme të Republikës së Ghanës, z. Lahi Muhamet Mumini dhe shefin e Kabinetit të Presidentit të këtij vendi, z. Michael Wilson.

    Zv.Kryeministri, z. Behgjet Pacolli duke falënderuar autoritetet përfaqësuese te Gahnës për gatishmërinë dhe respektin e treguar ndaj përfaqësuesve të Qeverisë së Kosovës, ka theksuar se roli i Ghanës në Samitin e Unionit Afrikan është i veçantë dhe shumë i rëndësishëm për Kosovën.

    Ky Samit do të mbahet në Kryeqytetin e Guineas Equatoriale, në Malabo, nga 28-30 të këtij muaji, prandaj zv.Kryeminsitri i Kosovës, z. Behgjet Pacolli, kërkoj nga Ministri, z. Muhamet Mumini që të shfrytëzoj këtë rast për të diskutuar lidhur me Kosovën dhe për nevojën që ka vendi ynë për njohje të reja nga vendet Afrikane.

    Z. Pacolli po ashtu informoj Ministrin e Jashtëm të Ghanës për zhvillimet demokratike në Kosovë, duke theksuar se Republika e Pavarur e Kosovës ka bërë hapa të rëndësishëm drejt konsolidimit demokratik të institucioneve shtetërore të saj.

    Zëvendëskryeministri i parë i Republikës së Kosovës, z. Behgjet Pacolli ka kërkuar po ashtu nga Ministri i Punëve të Jashtme i Ghanës, z. Muhamet Mumini të shqyrtoj mundësitë për të bashkëpunuar me Ministrinë e Punëve të Jashtme të Ugandës në mënyrë që bashkërisht të prezantojnë gjatë Samitit të Unionit Afrikan, si pikë të veçantë për diskutim, çështjen e unifikimit të qëndrimit të vendeve Afrikane, për njohjen sa më të shpejtë të Pavarësisë së Kosovës.

    Ministri i Punëve të Jashtme të Ghanës, z. Lahi Muhamet Mumini, ka vlerësuar lartë angazhimin e autoriteteve përfaqësuese të vendit tonë për shtimin e numrit të njohjeve për shtetin e pavarur të Kosovës dhe ka premtuar se do të bashkërendis veprimet me Ministrin e Punëve të Jashtme të Ugandës, z. Sam Kutesa për të shqyrtuar me seriozitet, gjatë këtij Samiti të Unionit Afrikan, mundësinë e njohjes së Pavarësisë së Kosovës nga këto vende.